Qisqacha mazmuni. Ushbu maqolada 9-sinf o‘quvchilari uchun biologiya fanidan o‘tkazilgan test sinovi natijalarining tadqiqoti amalga oshirilgan. Tadqiqot doirasida elementlar (test topshiriqlari) qiyinlik darajalari zamonaviy psixometrik yondashuvlar – Rash va ikki parametrli logistik (2PL) modellari yordamida baholangan. Maqolada ushbu ikki model bilan hisoblangan qiyinlik darajalari, ular o‘rtasidagi farqlar, elementlarning ajratish darajasi qiymatlari, ularning diagnostik imkoniyatlari va amaliy qo‘llanilishi tahlil qilingan. Shuningdek, klassik test nazariyasi bilan elementlarning nuqtaviy biserial korrelyatsiya koeffitsiyenti qiymatlari aniqlangan. Ushbu klassik ko‘rsatkichlar ikki parametrli modelda aniqlangan ajratish darajasi parametrlari bilan taqqoslanib, ularning o‘zaro bog‘liqligi tadqiq qilindi. Ajratish darajasi va nuqtaviy biserial korrelyatsiya koeffitsiyenti qiymatlarining bir-biriga mos holda o‘zgarayotganligi elementlarning ajratish darajasi haqida bu ikkita kattalik ham bir xil ma’lumot berishini ko‘rsatdi. Tadqiqot natijalari Rash va ikki parametrli modellarining elementlar sifatini aniqlashdagi samaradorligini, shuningdek, har bir modelning afzallik va cheklovlarini ochib beradi. Maqola natijalari test sinovlarini ishlab chiqishda hamda baholash tizimini takomillashtirishda foydali bo‘ladi.

Kalit so'zlar. nuqtaviy biserial korrelyasiya koeffitsiyenti, qiyinlik darajasi, Rash modeli, ikki parametrli model.