RASH MODELIDA TEST TOPSHIRIQLARI QIYINLIK DARAJALARINING INVARIANTLIGI
Ermamatov Mirshod Djumakulovich , Axborotnoma, 4-11, (2023), №4, 13.12.2024

Qisqacha mazmuni. Ushbu maqolada test topshiriqlarining qiyinlik darajalarini matematika fanidan o‘tgazilgan test sinovlarida qatnashgan guruhni shartli ravishda yuqori va quyi qobiliyat darajalariga bo‘lib hisoblash bilan Rash modelida har xil qobiliyat guruhlariga nisbatan ularning invariantligi o‘rganilgan. Test topshiriqlarining qiyinlik darajalari quyi va yuqori qobiliyat darajalari uchun klassik test nazariyasi va Rash modeli bilan aniqlandi. Klassik nazariyasida qiyinlik darajalari qobiliyat darajasiga nisbaton invariant emasligi, Rash modelida esa, aksincha, test topshiriqlari qiyinlik darajalarining invariantligi ko‘rsatildi.

FIZIKA FANIDAN O‘TKAZILGAN APROBATSIYA TEST NATIJALARINING ICHKI VA TASHQI MOSLIK STATISTIKALARI
Amonov Qobil Ashrafovich va boshqalar , Axborotnoma, 12-35, (2023), №4, 13.12.2024

Qisqacha mazmuni. Ushbu maqolada fizika fanidan umumiy o‘rta ta’lim maktablari, ixtisoslashtirilgan davlat umumta’lim maktablari 11-sinf va akademik litseylarning bitiruvchi o‘quvchilaridan ilmiy tadqiqot uchun olingan test sinovi natijalarining Rash modeli asosidagi tahlillari hamda test topshiriqlarining qiyinlik darajasi va sinaluvchilar qobiliyat darajalarining ichki (infit) va tashqi (outfit) mosligi o‘rganildi. Test topshiriqlarining ichki moslik darajasi 0,7-1,3 oralig‘idan tashqariga chiqmaganligini, ammo tashqi mosligi 0,7 dan kichik va 1,3 dan katta bo‘lgan test topshiriqlari mavjudligi va bu test topshiriqlariga berilgan javoblar mutanosib emasligi aniqlandi.

PARALLEL TESTLAR YORDAMIDA STANDARTLIKNI TA’MINLASH: 2022-2023 YILLARDA BIOLOGIYA FANIDAN O‘TKAZILGAN TEST SINOVI NATIJALARI
NORMURODOV ASROR BAZAROVICH va boshqalar , Axborotnoma, 36-66, (2023), №4, 13.12.2024

Qisqacha mazmuni. Ushbu maqolada biologiya (o‘zbek, rus va qoraqalpoq tili guruhlari uchun) fanidan 2022-2023 va 2023-2024-o‘quv yillarida bakalavriatga kirish test sinovlari natijalarining klassik test nazariyasi va Rash modeli bilan olingan statistik ko‘rsatkichlari solishtirilgan. Ikkita o‘quv yilida o‘tkazilgan bakalavriatga kirish test sinovlarida foydalanilgan test varianlarining o‘rtacha qiyinlik darajalari, test topshiriqlarining qiyinlik darajalari va sinaluvchilarning qobiliyat darajalari, o‘rtacha qiymat, mediana, moda, o‘lchashning standart xatoligi haqida xulosalar keltirilgan. Test topshiriqlarining qiyinlik darajalari va qobiliyat darajalarining o‘zaro mosligini ko‘rsatuvchi Rayt xaritasi va test ma’lumoti chiziqlari o‘rganilgan. Biologiya fanidan 2022-2023 va 2023-2024-o‘quv yillarida bakalavriatga kirish test sinovlarida parallel test varianlaridan foydalanilganligi va ikkita o‘quv yilda ham o‘zlashtirishlari past bo‘lgan sinaluvchilar soni juda ko‘p ekanligi ko‘rsatilgan.

Test xarakteristikalarini o‘rganish: milliy sertifikat bo‘yicha test sinovi natijalari
Sattiyev Abdulaziz Rasuljonovich va boshqalar , Axborotnoma, 67-96, (2023), №4, 13.12.2024

Qisqacha mazmuni. Ushbu maqolada 2023-yilda respublika boʻyicha ona tili va adabiyot fani boʻyicha milliy sertifikat uchun oʻtkazilgan test sinovlari natijalari klassik test nazariyasi va Rash modeli asosida tahlil qilingan. Foydalanilgan variantlar boʻyicha olingan natijalarning tavsif statistikasi va har bitta test topshiriqlariga berilgan javoblarning umumiy ball bilan korellyatsiyasi muhokama qilingan. Uchta test sinovida ishlatilgan variantlardagi test topshiriqlarining qiyinlik darajasi klassik test nazariyasi va Rash modeli bilan tahlil qilingan. Rash modeli bilan olingan qobiliyat va qiyinlik darajalaridan foydalanib uchta test varianti uchun Rayt xaritalari olingan. Olingan element xarakteristikasi hamda element va test ma’lumoti chiziqlari asosidagi tahlillar keltirilgan.