RASH MODELI BILAN MOSLIK: BIOLOGIYA FANIDAN O‘TKAZILGAN TEST SINOVI NATIJALARI
NORMURODOV ASROR BAZAROVICH va boshqalar , Axborotnoma, 4-21, (2023), №3, 05.12.2023

Qisqacha mazmuni. Ushbu maqolada biologiya fanidan umumiy o‘rta taʼlim maktablarining 9-sinf bitiruvchi o‘quvchilaridan ilmiy tadqiqot uchun olingan test sinovi natijalari R dasturining Dexter to‘plamida hisoblashlarga asoslangan holda Rash modeli bilan tahlil qilindi va model bilan moslik o‘rganildi. Rash modeli ehtimollarga asoslangan model bo‘lib, qobiliyat darajasi va test topshiriqlari qiyinlik darajalarining o‘zaro ta‘sirini tavsiflaydi hamda o‘lchov jarayonlarini paralellashtiradi. Bunda qobiliyat va test topshiriqlari qiyinlik darajalarini hisoblash chiziqli o‘lchash orqali amalga oshiriladi. Bir o‘lchovli konstruktlar uchun tuzilgan test topshiriqlarining qiyinlik darajalari tanlanma guruhlarga va qobiliyat darajalari test variantiga bog‘liq bo‘lmasligi ta‘minlanadi. Test topshiriqlari xususiyatlarini Rash modeliga moslashtirishni tahlil qilish muammoli elementlarni aniqlash va o‘ziga xos xususiyatlarga ega bo‘lgan qobiliyatlarni ajratish imkonini beradi.

Produktiv ko'nikmalarni baholash uchun mutaxassislarni tayyorlash: aniqlik va ishonchlilikni oshirish
Abbosov Avazbek Abdulhamid o'g'li , Axborotnoma, 22-31, (2023), №3, 05.12.2023

Qisqacha mazmuni. Turli sohalarda, masalan, tilni bilish darajasini tekshirish, yozish yoki og‘zaki nutqni baholashda baholovchilarning roli adolat, izchillik va ishonchlilikni saqlashda hal qiluvchi ahamiyatga ega. Til ko‘nikmalari yoki amaliy qobiliyatlarni namoyish qilishni o‘z ichiga olgan produktiv ko‘nikmalarini to‘g‘ri baholash insonning akademik, kasbiy yoki shaxsiy o‘sishiga sezilarli ta'sir ko‘rsatishi mumkin. Ushbu maqolada biz baholovchilarni tayyorlashning ahamiyatini ko‘rib chiqamiz va ularning aniqligi va ishonchliligini oshirish uchun samarali strategiyalarni o‘rganamiz. Biz baholovchilar duch keladigan qiyinchiliklarni, samarali baholash uchun zarur bo‘lgan ko‘nikmalarni va ularning ish faoliyatini yaxshilash uchun qo‘llanadigan o‘qitish usullarini muhokama qilamiz.

UMUMIY ELEMENTLI TEST VARIANTLARI: BIOLOGIYA FANIDAN OLINGAN TEST NATIJALARI
Ermamatov Mirshod Djumakulovich va boshqalar , Axborotnoma, 32-50, (2023), №3, 05.12.2023

Qisqacha mazmuni. Ushbu maqolada umumiy elementli test variantlari bilan qobiliyatni baholashning obyektivlik uchun muhimligi 9-sinflardan biologiya fani bo‘yicha olingan test sinovlaridan klassik test nazariyasi va Rash modeli bilan olingan qiyinlik darajalarini taqqoslash hamda test xarakteristikasi chiziqlari bilan ko‘rsatilgan.

TARIX FANIDAN MILLIY SERTIFIKAT UCHUN OʻTKAZILGAN TEST SINOVI NATIJALARINING KLASSIK TEST NAZARIYASI VA RASH MODELI ASOSIDA TAHLILI
Sattiyev Abdulaziz Rasuljonovich va boshqalar , Axborotnoma, 51-72, (2023), №3, 05.12.2023

Qisqacha mazmuni. Ushbu maqolada O‘zbekiston Respublikasi boʻyicha ilk bor tarix fanidan Milliy sertifikat uchun oʻtkazilgan test sinovlari natijalari klassik test nazariyasi va Rash modeli asosida tahlil qilingan. Tavsif statistikasi va alohida test topshiriqlariga berilgan javoblarning umumiy ball bilan korrelyatsiyasi hamda test sinovida ishlatilgan variantdagi test topshiriqlarining qiyinlik darajasi tahlil qilingan. Rash modeli bilan hisoblangan qobiliyat va qiyinlik darajalaridan foydalanib Rayt xaritasi olingan va shu asosda qobiliyat va qiyinlik darajalari mosligi, ichki va tashqi moslik statistikalri, element xarakteristikasi, element va test ma‘lumoti chiziqlari muhokama qilingan.

FIZIKA FANIDAN TEST SINOVI NATIJALARINING STATISTIK TAHLILI
Amonov Qobil Ashrafovich va boshqalar , Axborotnoma, 73-96, (2023), №3, 05.12.2023

Qisqacha mazmuni. Ushbu maqolada umumiy o‘rta ta’lim maktablari, ixtisoslashtirilgan davlat umum ta’lim maktablari va akademik litseylarning 11-sinf bitiruvchi o‘quvchilaridan ilmiy tadqiqot maqsadida fizika fanidan olingan test sinovi natijalarining klassik test nazariyasi va Rash modeli asosidagi tahlillari o‘rganildi. Test sinovlarining statistik tahlillari asosida ularning o‘rta qiymati, moda va medianasi test ballarining umumiy dispersiyasi aniqlandi. Rash modeli asosida test topshiriqlarining qiyinlik darajalarining test topshiruvchilarning qobiliyat darajasiga mosligi, Rayt xaritasi o‘rganildi.